我哋系一个讲求“情、理、法”嘅国度，喺大家嘅观念上面，“情”同“理”可能比“法”来得重要。往往好多事，会因为“情”而产生“特殊处理、特别对待”，于是就产生咗可以超越规定、堂而皇之嘅“特事特办”。
比如我哋经常见到嘅结婚花车蒙住车牌。其实，结婚只系某两个人嘅私事。无论你一世人结几多次，都要守规矩。不过，好多人认为呢个系“人生大事，所以要特事特办”。遮住个车牌系习俗，费事啲车牌号码唔多好意头，于是就俾咗个借口自己“特事特办”。上落班高峰撞啱所谓“吉时”，绵绵嘅车队又唔守规矩，冲灯、乱停、摆阵影相，乜都做齐。路面交通就因为“特事”而特慢，试问，你结个婚咁大把，使唔使影响他人啊？
又比如高考考生迟到。既然系你人生大事，连高考都迟到？点解可以连“准考证”都唔记得带，点解会瞓到唔识醒呢？而呢啲情况下，又系一句“一世人只有一次”，又可以要求人哋“特事特办”。更严重嘅系，呢种“特事特办”精神会不断延伸，只要涉及自己利益，只要系“关乎一生嘅事”就属于“特事”。喺当事人嘅角度就可以撇开法律或者规定，俾佢哋“特办”。仲有更夸张嘅例子：有人用成副身家去炒盐，结果辟谣加上供应充足后，盐价稳定不变，嗰啲谂住发灾难财嘅炒家，不但唔知自己嘅行为系犯法，仲要“特事特办”要求盐业公司买返佢囤积嘅盐。同样，嗰啲几大都买间屋，又炒又住嘅老友，楼价升嘅时候就冇意见，楼价跌就要开发商赔钱。佢哋嘅理由都系“关乎自己一世嘅事”，所以要讲嘅唔系法理，而系人情……
讲到尾，其实“特事特办”嘅“特”，即系特权。呢啲特权就系衍生“人治”嘅基础，同法律完全拉唔埋边。喺我哋要求平等、闹人哋滥用特权嘅时候，睇下自己系咪一个“特权迷恋者”先。
●网友你点睇
@炎心炎脑：如果系救死扶伤嘅话，点样“特事特办”都冇问题，其它的嘅话就冇所谓“必要时”咯。
@果果俏妞儿：何为“特事”，谁说了算？
@sysy2004：在银行，很多老人家每天都排一两个小时的队才能办上业务，能不能为老人家们开放“特办”窗口呢？
你有嘢想讲？
